Messi bilen hoşlaşykdan soň Argentina «Monumentaly» terk edýär

Lionel Messiniň ýygyndy bilen hoşlaşygy baýramçylyk bolmalydy. Ýöne ol Argentinanyň iň meşhur stadionlarynyň biri bilen aragatnaşygy kesmegine sebäp boldy.

Sports.ru La Nacion neşirine salgylanyp habar berýär: Argentinanyň futbol assosiasiýasy (AFA) milli ýygyndynyň duşuşyklaryny mundan beýläk «River Pleýt» klubunyň «Monumental» stadionynda geçirmezlik kararyna geldi. Bu stadionda 80 müňden gowrak janköýer oturyp bilýär.

AFA-nyň prezidenti Klaudio Tapiýa bilen «River Pleýtiň» ýolbaşçylarynyň arasyndaky gatnaşyklar birnäçe aý bäri ýaramazlaşýardy. Iň soňky nokat 6-njy oktýabrda boldy. Şol gün Messi ýygyndy bilen hoşlaşdy.

Çäräni guramak kyn boldy: stadionda uly ekran hem, aýdymçylar üçin sahna hem ýokdy. Guramaçy Marketing Sports kompaniýasy klubuň çäklendirmeler goýandygyny aýtdy. Onuň sözlerine görä, artistler çykyş edip durka toky hem öçürilipdir.

«River Pleýt» bu aýyplamalary ret etdi. Klubuň aýtmagyna görä, ekranyň aýryljakdygy barada guramaçylara öňünden duýdurylypdyr. Guramaçylar bolsa iş duşuşygyny çärä bary-ýogy bir gün galanda geçiripdirler.

Dawa meýdançada hem göze ilýärdi. Messi hormatlananda Tapiýa meýdança çykmady. «River Pleýtiň» prezidenti Stefano Di Karlo bolsa futbolça ýatlama sowgadyny öz kabinetinde gowşurdy.

La Nacion-yň maglumatyna görä, AFA-da gatnaşyklary dikeltmek indi mümkin däl diýip hasaplaýarlar. Ýygyndynyň täze öý stadiony hökmünde täzeden gurlan «Siudad-de-La-Plata» stadionyna seredilýär. Häzirlikçe Argentinanyň öz ýurdunda oýnajak duşuşyklary meýilleşdirilmedik. Şonuň üçin janköýerler täze öýüň haýsy boljagyny entek bilenok.

Bilýärsiňizmi? Messi bilen hoşlaşyk dabarasynda oňa ýatlama sowgadyny meýdançada däl-de, «River Pleýtiň» prezidenti Stefano Di Karlonyň kabinetinde gowşurdylar.

Çeşmeler: sports.ru