«Men taýýar däl»: Klopp Žotanyň ölümi bilen henizem ýaraşmady

Ýurgen Klopp Diogu Žota hakdaky täze kitapda 28 ýaşynda aradan çykan hüjümçiniň ölümi bilen henizem ýaraşyp bilmändigini boýun aldy.

Mirror habaryna görä, Klopp hemme zadyň nähili başlanandygyny ýatlady. Ol «Wulwerhempton» toparynyň duşuşygyna tomaşa edip otyrka, derrew: «Men bu oýunçyny isleýärin» diýip pikir edipdir. Adatça oýunçylary skautlar we sport direktorlary teklip edýär, emma Žota babatda başlangyç tälimçiniň özünden çykypdyr.

2025-nji ýylyň tomsunda Diogu dogany Andre Silwa bilen awtoulag heläkçiliginde aradan çykdy. Bu habar Kloppy dilsiz galdyrypdyr. «Şu güne çenli muny kabul edip bilmedim» diýip, 58 ýaşly tälimçi boýun alýar. Söhbetdeşligiň dowamynda bolsa: «Men muňa entek taýýar däl» diýipdir.

«Liwerpulyň» kitapdan aljak ähli girdejisi Žotanyň adyndaky köpçülikleýin futbol maksatnamasyna gönükdiriler.

Bilýärsiňizmi? Žota «Liwerpul» bilen Premýer-ligada çempion bolanyndan bary-ýogy birnäçe hepde soň aradan çykdy.

Çeşmeler: mirror.co.uk