Fotograflar üçin geýim düzgüni: Paragwaý kluby yza çekildi

Paragwaýyň «Sportiwo Ameliano» kluby metbugat üçin girizen geýim düzgünini ýatyrdy: oňa 29 ýaşly fotograf Adriana Kabalýero we sosial ulgamlardaky tankyt sebäp boldy.

Daily Mail habaryna görä, klub «Olimpiana» bilen öý duşuşygynyň öň ýanynda žurnalistlerden we fotograflardan geýim düzgünini berjaý etmegi talap etdi. Sebäbi «klubuň institusional keşbini goramakdy». Düzgün erkeklere-de, aýallara-da degişlidi. Ýöne onda açyk ýakaly köýnekler we göbegi açyk goýmak aýratyn gadagan edilipdi. Aýallara bolsa diňe gara ýa-da goýy gök leggins geýmäge rugsat berildi.

Adriana bu düzgüniň özüne garşy ýazylandygyny duýdy. Onuň sözlerine görä, hemme zat onuň bir suraty internetde ýaýrandan soň başlandy. «Işimde mydama mümkin boldugyça amatly eşik geýmek isleýärin. Ir ýa giç, belki, şeýle bolmalydy» diýdi ol. Fotograf bu gadagançylygyň kärdeşleriniň işine-de päsgel berjekdigini aýtdy.

Tankyt güýçlenenden soň klubuň prezidenti Ektor Melgareho düzgüniň ýolbaşçylygyň razylygy bolmazdan çap edilendigini aýtdy. Ol muny «akylsyzlyk» diýip atlandyrdy: metbugat işgärleri özlerine nähili amatly bolsa, şeýle geýinip bilerler.

Bilýärsiňizmi? Adriana Kabalýeronyň Instagramda 200 müňden gowrak yzarlaýjysy bar.

Çeşmeler: dailymail.com