«Eýeler gitmeli»: Newill «Siti» üçin üç jeza teklip edýär

Gari Newill «Mançester Sitiniň» işi barada dymmady. Ol «Siti» üçin üç berk jeza teklip edýär. Ýöne ol bu klubyň ýok bolmagyny islemeýär.

Çeşmäniň habaryna görä, «Mançester Siti» 2009–2018-nji ýyllarda Premýer-liganyň maliýe düzgünlerini bozmakda günäkär tapyldy. Oňa bildirilen 115 aýyplamanyň 114-si tassyklandy. Klub özüni günäsiz hasaplaýar we karara şikaýat etdi. Ýöne köp habarlara görä, bu şikaýatyň kabul edilmegi ähtimal däl.

Indi klubyň öňünde jerime, transfer gadagançylygy, utuk aýyrmak, ligadan çykarmak ýa-da çempionlyk atlaryny elinden almak ýaly jezalar dur.

«Mançester Ýunaýtediň» rowaýaty Gari Newill «The Overlap Daily» gepleşiginde açyk gürledi: «Meniň pikirimçe, eýeler gitmeli, degişli döwrüň çempionlyk atlary alynmaly we birnäçe ýyla uzaýan utuk jezasy berilmeli.»

Ýöne Newill «Sitiniň» League One ýa-da League Two-a düşürilmegini islemeýär. Ol klubyň Premýer-liga dolanyp gelmegini isleýär. Şeýle hem ol eýeleri aýyrmagyň Mançesteriň gündogar bölegi üçin ägirt uly ykdysady netijeleri boljakdygyny boýun alýar.

Iň esasy mesele wagt. «Siti» bäş duşuşykdan soň ligada birinji ýerde barýar. Şu dynç günleri bolsa «Enfildde» «Liwerpul» bilen duşuşýar. Newilliň pikirine görä, eger «Siti» maý aýynda iş boýunça karar çykmanka kubogy göterse, futbol dünýäsinde uly gykylyk turar. Şonuň üçin iş fewral ýa-da mart aýyna çenli çözülmeli.

Karar heniz güýje girmedi. Ýöne neşiriň ýazmagyna görä, ol şu möwsüm gutarmanka tassyklanyp bilner.

Bilýärsiňizmi? Newill bir «Siti» janköýeri bilen gürleşipdir. Ol janköýeriň aýtmagyna görä, ýekşenbe güni janköýerler retro formalaryny geýip gelmekçi. Şeýdip, olar klubyny söýýändiklerini we gerek bolsa öňki ýagdaýyna dolanmaga taýýardyklaryny görkezmekçi.

Çeşmeler: football365.com