8 sekunt we rekord: Noýeriň ýalňyşy Bawariýa gymmat düşdi

Janköýerler entek ornuna oturmaga-da ýetişmänkä, Bawariýa eýýäm yzda galypdy. Bundesliganyň 63 ýyllyk taryhynda iň çalt pökgi şu gün «Augsburg» bilen duşuşykda geçirildi!

Bundesliganyň 5-nji tapgyrynda «Augsburg» bilen «Bawariýa» duşuşdy. Emin duşuşygyň başlanandygyny bildirip, sygyryny çalan badyna hemmeler geň galdy. Bary-ýogy 8 sekuntdan «Augsburgyň» goragçysy Robin Fellhauer hasaby açdy.

Bu pökgi nähili geçirildi? Ähli zat «Bawariýanyň» derwezeçisi Manuel Noýerden başlandy. Oňa yza pas berildi, ýöne ol topy gowy saklap bilmedi we özünden uzaga goýberdi. Soňra topy urup daşlaşdyrjak boldy, emma ol garşydaşa degdi. Fellhauer bu pursaty elden gidermedi we boş derwezä pökgi saldy.

Opta Sports maglumatyna görä, bu Bundesliganyň taryhynda iň çalt pökgi. Germaniýanyň çempionatynyň 63 ýyllyk taryhynda hiç kim munuň ýaly çalt pökgi geçirip bilmändi.

Öňki rekord 9 sekunt bolup, ony iki oýunçy paýlaşýardy: 2014-nji ýylda «Baýeriň» oýunçysy Karim Bellarabi we 2015-nji ýylda «Hoffenhaýmyň» oýunçysy Kewin Folland. Rekord on ýyldan gowrak saklandy, indi bolsa bir sekunt tapawut bilen täze eýesini tapdy.

Gyzykly ýeri, rekordy hüjümçi däl-de, goragçy goýdy. Fellhauer bu günü hiç haçan unutmaz, Noýer bolsa bu pursady tizräk unutmak isläp biler.

Bilýärsiňizmi? Bundesliganyň öňki rekordy, ýagny 9 sekunt, iki oýunçynyňkydy. Karim Bellarabi muny 2014-nji ýylda, Kewin Folland bolsa 2015-nji ýylda gaýtalapdy. Fellhauer olaryň ikisinden hem bir sekunt öň pökgi geçirdi.

Çeşmeler: sports.ru; sport-express.ru