135 müň orunly gigant: dünýäde gurulýan dört sany äpet stadion

Bürünç deprek görnüşli stadion, «Demirgazygyň Uemblisi» we San-Siro üçin täze öý. Futbol dünýäsiniň ýakyn ýyllardaky iň uly gurluşyklary.

Mirror Football habaryna görä, häzir dünýäde dört sany ullakan stadion gurulýar ýa-da gurulmaga taýýarlanylýar. Olaryň birnäçesi rekord goýmagy maksat edinýär.

Ilki bilen Wýetnamyň paýtagty Hanoý. Bu ýerde 135 müň orunly VinFast Trong Dong stadiony gurulýar, ol dünýäniň iň uly stadiony bolmaly. Gurluşyk dokuz aý mundan ozal başlandy, gapylaryny 2027-nji ýylyň iýulynda açmagy meýilleşdirýärler. Habarlara görä, taslamanyň bahasy takmynan 38 milliard dollar (28,8 milliard funt sterling). Stadion Wýetnamyň adaty bürünç deprek görnüşinde gurulýar we Olimpiýa sport şäherçesiniň merkezinde ýerleşer.

Ikinji orunda Marokko. Benslimanda 115 müň orunly Hasan II stadiony gurulýar. Taslama 2023-nji ýylyň oktýabrynda, Marokko 2030-njy ýyldaky dünýä çempionatynyň eýeleriniň biri bolanyndan soň yglan edildi. Bu ýerde «Raja», «Wydad» we Marokkonyň ýygyndysy oýnar. Açylyşy 2028-nji ýyla meýilleşdirilýär, bahasy bolsa 1 milliard funt sterling.

«Mançester Ýunaýted» 116 ýyldan soň «Old Trafford» bilen hoşlaşmagy karar etdi. Täze 100 müň orunly stadion köne meýdançadan 350 metr demirgazyk-günbatarda gurlar. Oňa eýýäm «Demirgazygyň Uembli» diýip at dakdylar. Klub ilki bahasyny 2 milliard funt sterling diýip hasaplapdy, ýöne 2026-njy ýylyň täze hasaplamasyna görä, bu jemi iki esse artyp biler.

Milanyň iki klubu «Milan» bilen «Inter» 1947-nji ýyldan bäri San-Siroda bile oýnaýarlar. Indi olar täze, 71 500 orunly stadiony bile gurarlar. Gurluşyk 2028-nji ýylda başlar.

Bilýärsiňizmi? Täze Milan stadionynda San-Sirodakydan 4 müňe golaý az orun bolar. Köne San-Siro diňe täze stadion gutarandan soň ýykylar, şonuň üçin «Milan» bilen «Inter» oňa çenli köne öýünde oýnamagyny dowam etdirer.

Çeşmeler: mirror.co.uk